Arisitum

UN CONDAMNE A MORT PAR DECAPITATION


Le document qui suit, retranscrit dans son intégralité, est daté du 4 avril 1558. Il s'agit des dernières volontés d'un condamné à mort auquel l'exécuteur de la Haute Justice va trancher la tête. Cette exécution a lieu dans un village héraultais, suite à la sentence prononcée par le lieutenant de prévôt de Montpellier:

Lan mil cinq cens cinquante huict et le quatriesme jour du moys davril, hors et près la ville de Ganges, et au desouz la croix dicte la Croix de Figou, et dans la graviere du fluve de Sumène, lieu ou estoyt dressé ung eschaffaud et pillier de boys pour illec coupper, trencher et decoller la teste à ung nommé Jehan Vincens, dict Cap de Boteilhe, condampné par sentence contre luy proférée le jour présent par Monsieur Mestre Guilhaume Rogier, lieutenant de prévost en la diocèse de Montpellier, seroit esté le dict Vincens, le quel estant sus le dict eschaffaud, et entre les mains de lexecuteur de la Haulte Justice, illec venu pour metre a execution la dicte sentence, en la présence du dict Monsieur le Lieutenant de Prévost, de moy notère royal et tesmoings soubzescriptz, y estant, le dict Vincens auroit dict, déclaré et de sa propre bouche proféré que iniustement, faulcement et iniquement contre Dieu et vérité, il auroit accusé Monsieur Mestre Jehan Blachière, licencié en médecine, et maistre Jehan Carrière, menuisier, habitans de la ville de Ganges, aussi auroit dict et déclairé avoir accusé faulcement et malvaysement contre Dieu et vérité Pierre Devèze, filz à feu aultre Pierre, du chasteau de Brissac, diocèse de Montpellier, et Mestre Pierre Caulmel, mareschal du lieu de Sainct Bres de Colhoignac ou diocèse de Nismes, de laquelle accusation contre eulx iniquement proférée, sen repentoit et en demanda pardon à Dieu, Roy, Justice et ausdict Balchière, Carrière, Devèze, et Caulmel de ce que faulcement et iniquement les auroit accusés, pryant Dieu le luy vouloyr pardoner, de laquelle déclaration et excusation ainsi que dessus, par le dit Vincens faicte et proférée, Monsieur Mestre Bertrand Formy, lieutenant de Viguier en la dicte ville de Ganges en demanda acte en estre faicte parmoy notère soubsigné, présent à ce, en tesmoings, Noble Guilhaume De Bonailh, seigneur de la Balme, Sires Estienne Guibailh, Estienne Bosquet, marchans, Mestre Jehan Barssalon, appothicère, Glaude Azémar, cordonier, Michel Boyssière procureur dofficier en la court ordinère du dict Ganges, Guilhaumes Folquier, Mathieu Rossy, sergentz, habitantz de la dicte ville de Ganges, Mestre Jehan Colom, prestre et curé en la glise parochielle du dict Ganges, Sire Pierre Bosquet marchant du lieu de Sainct Laurens du Mynier, plusieurs aultres et moy François Martial.

Source: Archives Départementales de l'Hérault, minutes de Maître François MARTIAL, notaire de Ganges, registre côté II E 35/16, f° 6.

Auteur: Jean-Claude TOUREILLE jctou@arisitum.org


SOMMAIRE