Arisitum DOCUMENTATION OCCITANE
Manifest sia a totz universes e sengles qui aquesta carta veyran, que nos C., per la divinal providentia, avesque de Portoa e de Santa Rufina, legatz de la sea apostolical, attendens la devocion e la fezeltat del honrat pobol de Narbona, e las angoyssas els trebalhs qu'an sofertatz per deffension del negoci de Jeshu Crist, per auctoritat de la santa gleira de Roma, denuntia escomergatz totz aquelhs qui son avutz e d'ayssi enant seran per la guerra del negoci desus dig, a estirpar e cremar e talhar las vinhas, los blatz, los ortz, los molis, els vergiers dels homes de Narbona, e espressament les homes de Cabestang qui, az aysso, foron sobre malvatz, e de Bezers, e de Puegsoreguier, e de Vilanova, e de Cazols, e de Montels, e de Vilaspassans, e de Cruzi, et de Bizan de las Alheyras, e de Florensac, e de Murvielh, e de Cornelhan, e de Thezan, e de Columbiers, e de Poaliers, e de Celian, e de Salvian, e de Serinhan, e de Lespinhan, e de Caus, e de Ceceno, e de Aviatz, e de Bessan, e d'Azilhan, e de Laredorta, e d'Olonzac, e de Peyriac, e de Pipios, e de Azelhan, e de Cesseratz, e de totz los autres, quals que sian o d'on que sian, qui a la tala de Narbona son estatz e d'ayssi en ant seran per la guerra desus dicha. Autreyans e prometens fermamens, per auctoritat de la legacion que avem, que la davandicha sentencia nuls temps nos relayssara tro que la davandicha tala e malafacha a conoguda de IIII proshomes, dels quals II sian eslegitz de la gleira de Narbona e II de la universitat de Narbona, pleneyrament sia emendat. Espauzam, encara mays, per la davandicha auctoritat, las cauzas e las personas dels davanditz malfachors als homes de Narbona. E per que aquesta sentencia ferma estia, per garniment de nostre sagelh esforsam, e prometem que y farem pauzar los sagelhs dels avesques de la proensa de Narbona, e los sagelhs dels capitols de Narbona de San Just e de San Pastor, e de San Paul, e aquelha meteyssa sentencia a nostre senhor lo papa farem cofermar. Dada a Narbona, l'an de la Nativitat de Nostre Senhor M CC XXI, IIII kalendas de may.
Sources: Archives Communales de Narbonne, Inventaire des archives communales antérieures à 1790, rédigé par M. Germain Mouynés, archiviste du Département de l'Aude, Annexes de la Série AA, Emmanuel Caillard Imprimeur, Narbonne, 1871, pages 12